Nach ere schwiel warme Gwitternacht,

hänn sich 19 Fraue uff d'Socke gmacht.

Am 7:15 dien si scho uff em Bänkli in dr Schalterhalle warte

und pünktlig am 7:45 dien mir denn starte.

Kum hänn mir d'Stadt hinter uns glo

isch d'Barbara mit ere Schachtle Schokikäferli ko.

Jedes het uff em Buuch e Name vom ene Bärg us dr Wanderregion ka,

nur ich mit em Mont Blanc lieg wit näbedra

Jetzt muess ich halt dä Zweitägig nonemol revuepassiere lo,

damit im Mitteiligsblatt au öpis duet sto.

Aber scho bald hänn mir dä Zug wieder miesse verlo,

denn mir sin unterdesse in Interlake ako.

Dr Zug uff Grindelwald dä duet scho warte

und mir hänn rassig uff s'andere Peron übere miesse starte.

E schöni Fahrt dr Lütschine no, verbi an Wilderswil

und schon kunnt Grindelwald, unser Etappeziel.

Uff eme Sunneterässli hänn mir no e Käffeli gno

und uns von dr heerlige Bärgwält fasziniere lo.

Will d'Jacky wäge ihrem Fuess nit het könne mit uns ko,

het si derfür dä Kaffi uff Ihri Rächnig gno. (Härzlige Dank vo uns Alle!)

Mit hoffe, Du bisch bald wieder fit

und kunsch denn s'nägscht Johr wieder mit.

Und will mir gar nit so hänn miesse pressiere,

könne mir no gmietlig durch Grindelwald flaniere.                                                                                             

dr ausflug 2016 01

Denn kunnt s'Poschtauto wo uns uff die Grossi Scheidegg uffe fahrt,

denn dört isch unsere Wanderstart.

D'Barbara macht das ganz genial,

denn jetzt träffe alli Ihri eigeni Wahl.

Me ka uff d'Schwarzwaldalp abe laufe uff diräktem Wäg,

oder me entscheidet sich für dr Panoramawäg.

E paar wänn sich die ganzi Wanderig spare

und dien mit em Poschtauti uff d'Schwarzwaldalp abe fahre.

Au dr Panoramawäg het's in sich gha,

denn mir hänn e fantastischi Ussicht gha.

Vo de Ängelhörner bis zum Jungfraujoch,

sehn mit die Bärge ganz, ganz noch.

Die wo abegfahre sin, dien unde no d'Gegend erkunde

und hänn uff däm Rundgang au no e gmietlig Beizli gfunde.

Doch abe gfahre oder gloffe,

am spötere Nomidag hän mir uns alli im Gartebeizli troffe.

Mir hänn no öppis kiehls z' trinke zu uns gno

und au grad no dr Zimmerschlüssel beko.

 

dr ausflug 2016 02

D'Sabina rieft dr Kathi zuem Fänschter use: "kasch ko, s'isch alles parat"!

Do reagiere e paar Männer spontan und riefe:"ok, mir kömme grad"!

In dr Gartewirtschaft hänn natürlig alli glacht

und d'Sabina het schnäll s'Fänschter zuegmacht.

S'Lisbeth isch denn bim dusche  e bitz schnäll um d'Egge boge

und unsanft uff dr Steibode gfloge.

S'Handglänk isch gschwulle und duet weh,

drum hänn mir Ihm grad a Ponstantablette ge.

Zum Glück hänn mir Voltaren und e Bandage derbi,

und binde das Handglänk fachmännisch i.

Am Zyschtig im Notfall het äs s'Resultat beko,

s'Handglänk isch broche, mit eme Gips het äs s'Spital denn verlo.

Nach eme super guete z'Nacht

hänn mir uns denn spöter nach Bettehuuse uffgmacht.

Doch zerscht wird no e Flugzüg entfiert

und s'Elsi hett uns alli in dä Fall integriert.

E Funker, 2 schreegi Stuardesse, 2 Ganove, Passagier und dr Pilot mit em stiffe Huet.

Doch s'Fazit vo dere Gschicht, wenn me zämme hebt, kunnt's doch no guet.

Am andere Morge, dr Himmel isch no wolkeverhange,

dien mir schon uffs z'Morge blange.

Früsch gschtärkt dien mir in Tag ine starte,

denn d'Roselaui-Schlucht duet uff uns warte.

 

dr ausflug 2016 03

Zerscht gohts aber gmietlig im Rychebach no,

denn dien mit plötzlig vor eme gigantische Wasserfall stoh.

Mir wänn natürlig die Schlucht erkunde,

drum löhn mir d'Ruggsegg bim Hüttli unde.

Es goht durch die wildi Schlucht duruff, Tritt für Tritt

und mir nämme imposanti Bilder und Ydrügg mit.

Denn heissts aber wieder d'Ruggsegg schnappe,

für die nägschti Tagesetappe.

Die Meischte fahre denn mit em Poschtauto,

e paar wänn no per Pedes go.

Unterwägs fangts denn afo rägne a.

Zuem Glück hänn mir dört grad e Poschti-Haltstell gha.

S'Poschtauto fahrt au grad ii

usser vier, sinn bim Fahre alli derbi.

Bis Kaltbrunne dien mit die Autofahrt gniesse,

doch bim Usstiege duets Bindfäde giesse.

Mir dien uns unters Gartebeizlidach rette

und dänke, dass mir dört au öppis ässe wette.

Doch usser Schnipo git's nüt, duet d'Wirtin verzelle.

10 Fraue dien denn das Menu bschtelle.

S'Bescht isch aber, die het uns gar nid in d' Gaschtstube glo.

So hänn die Räschtlige halt nur öppis z' Trinke gno.

Unterdesse isch au d'Barbara, s'Dorli, Jutta und d'Silvia ako,

und mir alli hänn no e "Huuskaffi" zuem Uffwärme gno.

Drei hänn no welle nach Zwirgi abe marschiere,

dr Räscht losst sich vom Poschtauto abe chauffiere.

Mit hänn uns denn halt miesse d'Zyt vertriebe

mit S.M.S. und Karte schribe.

Au e Jässli isch no dinne gläge,

denn dusse wär me eh im Räge.

S'Poschti kunnt au schön zuer Zyt

und nimmt uns Fraue wieder mit.

In Zwirgi stiege die tapfere Wanderer (Barbara, Dorli, Silvia) zue

und zämme gohts denn Meiringe zue.

D'Brünigbahn die nimmt uns mit

über dr Brünig das isch e Hit.

Mit fahre über Bärg und Tal,

gsehn See und Dörfli überall.

Vo Luzärn nach Basel do sinn mer denn no gli

und schon heisst's :"Usstiege, unser Reisli isch verbi"!

Barbara, Du hesch das alles wieder super organisiert

und uns in e traumhaft schöne Egge von unserem Heimatland gfiert.

Drum, liebe Barbara, e grosses "DANKSCHÖN" vo uns Alle,

mir hänn's gnosse und es het uns super gfalle.

Mit freue uns - und das isch wohr,

jetze scho uff s'nägschte Johr.

Dini DR-Fraue Vally und Co.